عدة الخياطة
الخياطه من الحاجات اللي محتاجه مجهود و مثابرة، محتاجه مهارات معينه من اللي شغال عليها عشان النتيجه تطلع كويسه.
زي الدقه و الصبر سواء على المدى البعيد أو القريب…
يعني الشغل ممكن ميطلعش مظبوط من أول مره، و ممكن نحتاج وقت (شهور) عشان مستوانا في الخياطه يتحسن.
أكتر حاجه بتفرق معانا في النتيجة هي عدة الخياطه، لازم نفهم الأدوات المختلفة ووظيفتها، الإستثمار في العده الصح هيفرق معانا في توفير الوقت والمجهود وطبعاً المنتج النهائي بيبان فيه جداً.
دلوقتي هنعرفكم بالأدوات المختلفة..
أدوات القص
مقص عادي •
مقص القماش لازم يكون حاد جداً و يمشي بسلاسه في القماش، وده بيتحقق لما نسنه كل فتره (مش لازم يكون جديد) وكمان لازم نراعي عدم إستخدامه مع الورق أو أي ماده تانيه عشان ده بيأثر على كفائتة.
مقص صغير للتنضيف •
ده هايل لقص الفتل اللي بتتكون نتيجه الخياطه
مقص زجزاج •
و بيستخدم مع بعض أنواع الأقمشة لتجنب تنسيل الحواف، و أحياناً لأسباب تجميلية
مقص دائري •
يستخدم مع مسطره و لوحه تقطيع و بيستخدم للقص في خطوط مستقيمة قصيرة.
Seam ripper الفكاكة •
بيستخدم لفكل الخياطات الدقيقه بدون التأثير على القماش
أدوات القياس
• mạzwrh
مقاساها غالباً 150 سم و الناحية التانية بتكون مقياس البوصه.
زمان كانوا بيستخدموا المسطره الخشب الكبيره
العلامات
• العلامات مهمة لتحديد مكان القص أو الخياطه و لتعليم الباترون كمان، ممكن نستخدم مارك طباشير او شمع، قلم رصاص أو قلم قابل للغسيل
• عجله الروليت
من الأدوات المستخدمه في عمل العلامات وتستخدم مع ورق الكربون لنقل الباترونات
ادوات الخياطه
• إبر
بتكون بماقاست وأطوال مختلفه
نصيحة غزل بنات: دوروا على الإبر المفتوحه، بتتلضم أسهل
• دبابيس
الدبابيس مهمة جدا لتثبيت القماش اثناء الخياطة وممكن تضيع أو تتوه فممكن تخليها في متناول ايديك بالشكل ده
مش لازم يكون الألوان كلها عندنا بس على الأقل الألوان الأساسيه والمحايده.
أنواعة كتير ولازم نراعي الخيط المناسب، يعني مثلاً القطن بيتقطع بسهوله مع بعض الأقمشة على عكس البوليستر قوي ومناسب لأغلب الماكينات، عشان كده نحاول نستثمر في خيط كويس .
الخياطه اليدويه
لازم تطوري مهارتك في الخياطه اليدويه لأنك هتحتاجيها في وقت أكيد
أكتر غرزه مستخدمه هي غرزه السراجه
أدوات الباترون
• صفائح
• مساطر الحردات
بتستخدم لتسهيل رسم ونقل الحردات المختلفه، زي الكم والياقة
ماكينة الخياطة
• المكوك
محتاجين مكوك لكل لون خيط مستخدم فخلي عندك دايماً زياده
• ابر الماكينة
الأرقام الصغيرة على كبر حجم الإبرة أما الأرقام الكبيرة ( بعد رقم 9 ) فتدل على صغر حجم الإبرة ودقتها .وبفضل الإبرة رقم 9 للخياطة
لازم نفهم إن لكل نوع ماكينه إبر معينه
لازم يكون عندك زياده لأن أكتر مشكلات الخياطه بالماكنه هي كسر الإبر. ده غير إن بعد كل إستخدام المفروض نغير الإبره بس أنا بغيرها لما تتلم
الابره المزدوجه
• دواسة الماكينة
الدواسة بتتغير حسب اللي عايزين نعمله عليها، يعني مثلا لما نحتاج نركب سستة ممكن نستخدم دواسة مختلفه عن الخياطه العاديه و مختلف عن السرفله.
الصوره دي فيها الدواسات الأكثر شيوعاً
خامات أخرى
• زراير
تركيبها بيكون يدوي في الغالب وممكن كمان تركب بالماكينه بالدواسة المناسبة
• منزوع
بيكون ليها دواسة مخصصه لمكنه الخياطة، زي موضحنا فوق. وتركيبها مش سهل، محتاج حد متمرس.
• أستك
ليه تكنيك معين على المكنه هنتكلم عليه بعد كده
• بييه أو شريط الورب
مستخدم في تغليف الحواف واعطاءها شكل جمالي
• فازلين
ده الإسم الدارج ليه، أعتقد التسميه جايه من “فارسليه” و ده نوع قماش مستخدم في الحشو.
ليه محتاجين حشو؟ عشان أساوير الأكمام و الياقات و المردات تبقى ناشفه و سهله التشكيل، بنضطر نحط طبقه من الفازلين بين طبقتين من القماش المستخدم.
في كام نوع دارج إستخدامهم بس ممكن إستخدام تفتاه صناعي أو صوف خفيف لو القماش عندنا اللي عايزين نحشيه بيكون خفيف قوي زي الكريب مثلاً.
ملحوظة مهمة
لو القماش اللي هنستخدمه في أي مشروع مكرمش ومكسر، فالافضل نكويه قبل ما نبدأ قص.
لو جربنا نقص الاول وبعدين نستخدم المكواه، هنلاقي ان القماش شكله مش متسواي، او مختلف عن المقاس اللي عايزينه.
عدة الخياطة
موضوع: عدة الخياطة
